МАН-д өрнөх зодоон...

Нийтлэгдсэн огноо: 2017-05-30 18:10:00

Ганцхан сарын дараа Монгол Улсын тав дахь Ерөнхийлөгч тодорно. Энэ өрсөлдөөнд торойж үлдээд байгаа МАН болон УИХ-ын дарга М.Энхболд, АН-ын МоАХ фракцийн тэргүүн “Женко” Х.Баттулга, МАХН-аас “Босоо" Ганбаа нарын дунд жинхэнэ тааварлахын аргагүй тэмцэл явагдаж, нэг нь ялагч болно.

Мэдээж өнөөдөр Монгол Улсад Ерөнхийлөгч Ц.Элбэгдоржоос илүү эрх мэдэл, сүр хүчийг эзэмшиж байгаа УИХ-ын дарга М.Энхболд “Женко” Х.Баттулга нарын хооронд гол өрсөлдөөн болно хэмээн улстөр судлаачид дүгнэж байгаа ч өөртөө “Ард түмний хүү” хэмээх тун хүчтэй, эвгүй пиар бодож олчихоод байгаа “Босоо" Ганбааг дутуу үнэлж хэрхэвч болохгүй. Тэрбээр өнөө хоёроосоо толгой илүү шоволзоод гараад ирдэггүй юм гэхэд өөрийнх нь хэлээд байгаа шиг МАНАН-г сарниах хэмжээнд саналыг нь хувааж өлхөөн чадна.

Хэрвээ эрх баригч МАН-ынхан өнгө мөнгөөр зодож, сонгуулийн байж болох бүх л булхай луйврыг уралдуулсаар УИХ-ын дарга М.Энхболд тодрон гарч Монгол Улсын дараагийн Ерөнхийчлөгчөөр сонгогдвол одоо хашиж байгаа улстөрийн бүх албан тушаалаасаа хуулийн дагуу түдгэлзэх учиртай. Энд мэдээж хамгийн эхэнд МАН-ын даргын албыг ээлжээ хүлээж байгаа аз од нь гийсэн залгамжлагчдаа шилжүүлэх болно.

Улстөрийн намуудын бичигдээгүй хууль, дүрэм ёсоор өнөөдөр Ерөнхий сайдаар ажиллаж байгаа Ж.Эрдэнэбат М.Энхболдын оронд МАН-ын даргын суудалд хүссэн хүсээгүй нэр нь яригдаж таарна. Гэтэл М.Энхболдын бодож олсон Ерөнхий сайд буюу Ж.Эрдэнэбат намын даргын суудалд залрах хэмжээний нэр нөлөө, нам доторх дэмжлэг тун сулхан нөхөр. Харин өмнөх УИХ-аас өөрийн хүсэлтээр чөлөөлөгдөж, Монголын улстөрөөс хэсэгхэн хөндийрөөд байсан Шадар сайд У.Хүрэлсүхийн хүчирхэг амбиц эргэн сэргэж байгаа өнөөдрийн тухайд МАН-ын дараагийн даргын суудал түүнд бүхнээс илүү ойрхон байгаа юм.

2016 оны УИХ-ын сонгуулийн өмнө туйлын хүчирхэгжиж амжсан МАН доторх “Нийслэлийн” буюу УИХ-ын дарга М.Энхболдын толгойлдог фракцийг өндийхгүй болтол нь намнахын тулд У.Хүрэлсүхэд УИХ-ын Дэд дарга Ц.Нямдорж, Их Британид суугаа Элчин сайд С.Баяр, Ерөнхийлөгч асан Н.Багабанди, саяхан болсон шинэ Элчин сайд нарын томилгооны үед өөрийнхөө хүнийг шахаж чадаагүй гомдол нь ид буцалж яваа УИХ-ын гишүүн Ө.Энхтүвшин гээд хүчирхэг дэмжигчдийн бүлэг хэрэгтэйг тэрээр сайн мэдэж байгаа. Ингэхийн тулд М.Энхболдын өнөөдөр хашиж байгаа УИХ-ын даргын суудлыг Ц.Нямдоржид бэлэглэх компанит ажлыг Шадар сайд У.Хүрэлсүх өөрөө толгойлох ёстой болно. Ц.Нямдорж ч хүссэн суудалдаа суунгуутаа “Аяганы хариу өдөртөө”-г нотолж У.Хүрэлсүхийг МАН-ын даргад хоёр гараа өргөн дэмжихээс гадна УИХ-ын 65-ын бүлгийг толгой түрүүгүй загнаж байгаад араасаа дагуулчихна. Ингэсэн цагт Ж.Эрдэнэбатын суудал ч ганхаж У.Хүрэлсүх дараагийнхаа том төлөвлөгөө буюу Монгол Улсын 32 дахь Ерөнхий сайдын суудлын төлөөх гол тэмцэлдээ шилжих нь ойлгомжтой.

Харин М.Энхболдын сонгогдсон Төв аймгийн 28 дугаар тойргийг МАН-ын Ерөнхий нарийн бичгийн дарга Д.Амарбаясгаланд “Алчуур болгоод бэлэглэчихнэ” гэсэн яриа МАН-ын Цагаан ордон хавиар шуугилдаж байгаа ч өнгөрсөн сонгуулиар М.Энхболдод ялагдсан АН-ын нэр дэвшигч, Ерөнхий сайд асан Бямбасүрэнгийн охин Энхбайгалийн хүчийг дутуу үнэлж болохгүйг хэн хүнгүй мэдэж байгаа. Тэгээд ч саяхан Ерөнхийлөгчийн сонгуульд нэр дэвшигчид үнэмлэхээ гардахад “Женко” Х.Баттулгад хамгийн их шадарласан нь Д.Бямбасүрэн гуай байсныг М.Энхболд ч У.Хүрэлсүх ч харцгаасан.

Гэхдээ Төв аймагт Д.Амарбаясгаланг мөргөж унагаж болзошгүй тун эвгүй нэгэн өрсөлдөгч байгааг ч тооцооноос хасч болохгүй. Тэр эвгүй нөхөр бол Шадар сайд У.Хүрэлсүхтэй хамт Хадгаламж банкны 14 тэрбумын хэрэгт ороолцолдож явсан ЗГХЭГ-ын дарга Ж.Мөнхбат юм. Мэдээж Солонгосын казинод хамтдаа тоглож явсан гэгддэг Ж.Мөнхбат андыгаа хүчирхэг цээжээрээ хамгаалах хүн нь өнөөх л Шадар сайд У.Хүрэлсүх гэдэг нь хэнд ч ойлгомжтой асуудал. МАН-д эрх мэдлийн дараагийн эздээр тодрохын тулд 70-аад оныхон буюу У.Хүрэлсүх, Ж.Мөнхбат, Ж.Энхбаяр, Т.Аюурсайхан зэрэг амбицтай, хүчтэй залуучууд хүссэн хүсээгүй нэг талдаа гарч таарна.

Хамгийн гол нь Ерөнхийлөгчийн сонгуульд М.Энхболд ялалт байгуулчихвал тэрхүү их ялалтыг дагалдан МАН-д томоохон пижигнэлдээн эхэлж, цоо шинэхэн хүчний хуваарилалт хийгдэнэ. Энд мэдээж У.Хүрэлсүхийн толгойлдог “Зүүний хүчнийхэн” болон М.Энхболдын дараа “Нийслэлийн” бүлгийг командлах ИТХ-ын дарга Ц.Сандуй УИХ дахь хаашаа ч хөлбөрч магадгүй “Нялхсын бүлэг”, өвгөчүүдийн фронт гээд маш олон эрх ашиг, сонирхлын зөрчилтэй товаришуудын хооронд “Цусгүй дайн” өрнөх нь тодорхой.

Харин хамгийн тодорхой зүйл нь МАН-д У.Хүрэлсүхийн хүчирхэгжилт, түүний эрин эхлэх нь бараг л тодорхой болж үүнээс үнхэлцгээ хагартал айн ширвээтэж эхлээд байгаа “Нийслэлийн” бүлгийн гишүүд саявтархан “Хүрэлсүхийг снайпердах” талаар “Том ах”-даа илэн далангүй тайлбарлаж байгаа яриа цахим ертөнцийг шуугиулаад авсан билээ. Мэдээж У.Хүрэлсүх алийгаа мэдэхгүй бацаан биш нь тодорхой тул ямар хариу арга хэмжээ авах, хэн хэнтэй тооцоо бодохоо тун янхуур төлөвлөж, хэн хэнийг өөртөө татан элсүүлэх, хэнтэй дайтахаа ч аль эрт боловсруулчихсан болов уу.

Ийнхүү хэсэгхэн нам жим байсан Монголын улстөр дахин пижигнэлдэх нь тодорхой болж байгаа бөгөөд энэ удаа эрх баригч МАН дотор жинхэнэ дажин дэгдэх нь цаг хугацааны л асуудал болжээ...