ОХУ-ын энхийг сахиулагчид хоёр өдрийн дотор Казахстанаас гарна 2022 / 01 / 12
Нийтлэгдсэн огноо: 2022-01-12 13:53:00
Казахстаны баячууд, томоохон компаниуд тогтмол хураамж төлөх болно
Казахстаны Ерөнхийлөгч Касым-Жомарт Токаев өнгөрсөн мягмар гарагт Казахстаны парламентын өмнө хэлсэн үгэндээ, "Хамтын Аюулгүй Байдлын Гэрээний Байгууллагад харъяалагдах энхийг сахиулагчдын гол даалгавар амжилттай дууссан." хэмээн мэдэгдэж, ОХУ-ын энхийг сахиулагчид хоёр өдрийн дотор Казахстанаас гарна гэдгийг онцолжээ.
Өнгөрсөн долоо хоногт хийн түлшний үнийн нэмэгдлийг эсэргүүцсэн иргэдийн жагсаал цуглаан хяналтаас гарч, жагсагчид засаг захиргааны байрууд руу дайрч, Алматы хотын нисэх онгоцны буудлыг хүртэл хэсэг хугацаанд эзэлсний дараагаар Казахстаны Ерөнхийлөгч Касым-Жомарт Токаёв Казахстанд үүссэн эмх замбараагүй байдлыг намжаахын тулд Хамтын Аюулгүй Байдлын Гэрээний Байгууллагаас тусламж хүссэн юм.
Түүний мэдээлж байснаар эмх замбараагүй байдал үүсгээд буй жагсагчид нь сайтар бэлтгэгдсэн "алан хядагч нар" байсан аж. Казахстаны Дотоод хэргийн яамнаас мэдээлснээр эмх замбараагүй байдлын үеэр 164 хүн амь үрэгдэж, цагдаа нар 9900 хүнийг баривчилжээ.
Казахстан даяар хэв журам тогтож, нөхцөл байдал хэвийн дэглэмдээ орж байгаатай холбоотойгоор Ерөнхийлөгч Касым-Жомарт Токаев иргэдийн бухимдлыг багасгах зорилгоор Казахстаны парламентын өмнө мэдэгдэл хийсэн байна.
Тэрээр 1991-2019 оны хооронд төрийн Казахстаны төрийг Нурсултан Назарбаев удирдаж байх үед Казахстанд олон улсын стандартаар баян чинээлэг гэж тодорхойлогдох хүмүүсийн давхарга үүссэн гэдгийг онцолжээ.
81 настай Нурсултан Назарбаев Казахстанд эмх замбараагүй байдал үүссэнээс хойш олон нийтийн өмнө гараагүй ба Ерөнхийлөгч Касым-Жомарт Токаев Н. Назарбаевыг өнгөрсөн долоо хоногт Казахстаны Үндэсний Аюулгүй Байдлын зөвлөлийн тэргүүний суудлаас нь огцруулсан билээ.
Олон улсын ажиглагчдын үзэж байгаагаар Нурсултан Назарбаев ба түүний гэр бүл, ойр дотныхон нь хэт баяжсан явдал нь Казахстанд эсэргүүцлийн хөдөлгөөн үүсэхэд нөлөөлсөн гол хүчин зүйлсийн нэг аж. Ерөнхийлөгч Касым-Жомарт Токаев тэдгээр баян чинээлэг хүмүүс, их хэмжээний ашиг олж буй компаниуд түүний байгуулахаар төлөвлөсөн "Казахстаны Ард Иргэдийн Төлөө" үндэсний санд тогтмол журмаар хураамж төлөх болно хэмээн мэдэгджээ.
Тэрээр засгийн газраас шинээр байгуулагдах үндэсний санд хураамж төлөх компаниудын нэрсийг гаргахыг даалгажээ. Түүнчлэн Ерөнхийлөгч Касым-Жомарт Токаев Алихан Смайловыг Ерөнхий сайдаар томилжээ.
Өнгөрсөн долоо хоногт Казахстаны хууль сахиулагчид Казахстаны Аюулгүй байдлын албаны дарга Карим Масимовыг өөр бусад албан тушаалтнуудын хамт эх орноосоо урвасан хэргээр баривчилсан юм.
Түүний баривчилсан явдал Казахстанд үүссэн эмх замбараагүй байдал Казахстаны эрх баригчдын хоорондын тэмцэлтэй холбоотойг хэсэгчлэн баталж байна хэмээн ажиглагчид үзэж байна.
Түүнээс гадна Ерөнхийлөгч Касым-Жомарт Токаев ОХУ-аас тусламж хүссэн нь тухайн үед тэрээр улсынхаа аюулгүй байдлын албаныханд бүрэн итгэхгүй байсантай холбоотой, ОХУ-ын энхийг сахиулагчдын тусламжтайгаар өөрийгөө болон засгийн газраа хамгаалж үлдэх зорилготой байсан гэжээ.
Эх сурвалж: The Guardian
Содномцэрэнгийн Энхзаяа
ikhmongol.mn
холбоотой мэдээ
Сэтгэгдэл
-
ERDENE • 2022-01-14 08:18 172.107.194.166
