Энэ онд Индонезид бөөрний цочмог дутмагшлаас болж 74 хүүхэд нас барсан асуудлыг шалгаж байна 2022 / 10 / 19
Индонезид бөөрний цочмог дутмагшлаас болж хүүхдүүд нас барсан явдлыг шалгаж байна. Индонезийн Эрүүл мэндийн яамнаас мэдээлснээр энэ он гарснаас хойш тус улсад 70 гаруй хүүхэд бөөрний цочмог дутмагшлаас болж нас барсан явдлыг мэргэжилтнүүдийн баг шалгаж байгаа аж.
Энэтхэгт үйлдвэрлэсэн халуун бууруулах үйлчилгээтэй парацетамол эмийн найрлагатай сиропыг хэрэглэсэнтэй холбоотойгоор Гамби улсад бөөрний цочмог дутмагшлаас болж 70 хүүхэд нас барсан билээ.
Гамбид борлуулагдаж байсан Энэтхэгийн Мэйден фармасевтикалс компанийн ханиадны 4 сиропт диэтилен гликоль, этилен гликолийн хэмжээ хэтэрсэн байсныг тогтоожээ.
Индонезид дээрх үйлдвэрийн сиропнууд борлуулагддаггүй ч Индонезийн эрх баригчид диэтилен гликоль, этилен гликоль будисуудыг хүүхдийн эмчилгээний бүх сиропт ашиглахыг хориглоод байна.
Индонезийн Эрүүл мэндийн яамны төлөөлөгч Сити Надиа Тармизигийн мэдэгдсэнээр 2022 он гарснаас хойш хүүхдүүдийн дунд бөөрний цочмог дутмагшлын 189 тохиолдол бүртгэгдсэний 74 нь нас барсан аж. Бөөрний цочмог дутмагшлаар оношлогдсон хүүхдүүдийн дийлэнх нь 5-аас доош насны хүүхдүүд байжээ.
Бөөрний цочмог дутмагшлын өвчлөл нэмэгдсэн явдлыг шалгах мэргэжилтнүүдийн багт Индонезийн Эрүүл мэндийн яам, Индонезийн Хүүхдийн эмч нарын холбоо, ДЭМБ-ын мэргэжилтнүүд тус бүр багтжээ.
Түүнчлэн Индонезийн тал Гамбид гарсан тохиолдлуудыг судалж буй ДЭМБ-ын мэргэжилтнүүдтэй хамтарч байгаа аж. Индонезийн Эрүүл мэндийн яам эмнэлгүүдээс бөөрний цочмог дутмагшлаар оношлогдсон хүүхдүүдийн гэр бүлийнхнээс хүүхэддээ өгсөн бүх эм, тариануудыг нь цуглуулж, шалгахыг даалгажээ.
Мөн эмийн сангуудад сиропын төрлийн эмнүүдийг борлуулахаа зогсоохыг үүрэг болгосон байна.
Өмнө нь Энэтхэгт үйлдвэрлэсэн ханиадны сиропноос хүүхдүүд хордсон тохиолдол Энэтхэгээс гадна өөр улсуудад бүртгэгдэж байсан билээ.
Энэ нь дэлхийн 200 гаруй оронд эм, тариа экспортолдог Энэтхэгийн эмийн үйлдвэрлэлийн салбарын хяналт шалгалт сул байдагтай холбоотой хэмээн ажиглагчид онцолж байна.
Эх сурвалж: Reuters
Содномцэрэнгийн Энхзаяа
ikhmongol.mn
холбоотой мэдээ
Сэтгэгдэл
