Суданы Хартум хотод биологийн гаралтай аюултай үзэгдэл гарах эрсдэл өндөр байна 2023 / 04 / 26
Суданы төрийн эрхийн төлөө байлдаж буй талууд улаанбурхан, холер зэрэг цочмог халдварт өвчнүүдийн үүсгэгчид болон бусад төрлийн биологийн аюултай материалууд хадгалагдаж буй лабораторийг хяналтандаа авснаар тус хотод биологийн гаралтай аюултай үзэгдэл гарах өндөр эрсдэлтэй байгааг ДЭМБ-аас анхааруулжээ.
ДЭМБ-аас Суданд суугаа төлөөлөгч Ниима Саид Абид сэтгүүлчдэд өгсөн ярилцлагадаа тэдгээр биологийн материалуудын аюулгүй байдлыг хангах гэсэн лабораторын ажилтнууд Үндэсний Нийгмийн Эрүүл мэндийн лаборатори луу нэвтэрч чадахгүй байгаа тухай мэдэгджээ. Тэрээр, "Биологийн материал, бодис зэргүүдийг аюулгүй битүүмжлэхээр очсон лабораторийн ажилтнууд лаборатори луу орж чадахгүй байгаа нь гол асуудал болоод байна." хэмээн мэдэгдсэн ч Суданы зэвсэгт хүчин, Хагас цэрэгжсэн RSF байгууллагын аль нь лабораторийг хяналтанд авсныг дурдаагүй байна ДЭМБ-ын судалгаагаар энэ сарын 15-нд Суданд эхэлсэн зэвсэгт мөргөлдөөний улмаас 459 хүн амь үрэгдэж, 4072 хүн шархдсан аж.
Нөгөө талаас амь үрэгдсэн иргэдийн тоо үүнээс өндөр байх магадлалтайг Ниима Саид Абид онцолсон байна. Цэргийн хоёр хүчин хоорондын зэвсэгт мөргөлдөөний улмаас эмнэлгүүд, үйлчилгээний бусад байгууллагуудын үйл ажиллагаа доголдож, иргэд гэртээ хоо хүнс, цэвэр усгүй гацсан байдалтай байгаа аж.
ДЭМБ-ын мэдээлснээр зэвсэгт мөргөлдөөн эхэлснээс хойш эрүүл мэндийн байгууллагууд руу халдсан 14 тохиолдол бүртгэгдсэн ба ДЭМБ ажилтнуудаа нүүлгэн шилжүүлэхээр ажиллаж байгаа аж. НҮБ Судан дахь зарим үйл ажиллагаагаа хязгаарлахад хүрсэн байна.
Зэвсэгт мөргөлдөөний үеэр НҮБ-ын Цагаачлалын олон улсын байгууллага мөн Хүнсний хөтөлбөрийн ажилтнууд амиа алдсантай холбоотойгоор дээрх хоёр байгууллага Судан дахь үйл ажиллагаагаа зогсоосон байна.
Олон Улсын Улаан Загалмай Нийгэмлэгийн Африкийг хариуцсан захирал Патрик Юсэф байлдаж буй талуудад галаа зогсоож, асуудлыг хэлэлцээрийн замаар шийдэхийг уриалахыг бусад улс орнуудаас хүсчээ.
Эх сурвалж: BBC
Содномцэрэнгийн Энхзаяа
ikhmongol.mn
холбоотой мэдээ
Сэтгэгдэл
