Е. Пригожин Орост хувьсгал гарч болзошгүй гэж анхааруулав

Нийтлэгдсэн огноо: 2023-05-25 11:10:00

Оросын хувийн цэргийн Вагнер группыг үндэслэгч Евгений Пригожин ОХУ-д 1917 оных шиг хувьсгал гарч, Оросын баячууд Украинд болж буй дайнд зохих ач холбогдлыг өгөхгүй бол ОХУ Украинд ялагдах аюултай байгааг анхааруулжээ. Тэрээр Барууны орнууд ОХУ-Украины дайнаас залхана, Бээжин Орос-Украины асуудлыг энхийн замаар шийдэх гарц гаргалгааг гаргаж ирснээр дайн дуусна гэдэгт эргэлзэж байгаа гэжээ.

Түүний үзэж байгаагаар Украины сөрөг довтолгоо нь оросуудыг 2014 онд Крымийн хойгийг нэгтгэхээс өмнөх байршилд аваачих зорилготой ба украинчууд Бахмутыг бүсэлж, Крым руу довтлохыг оролдох аж. Telegram дахь хуудсандаа нийтэлсэн ярилцлагадаа тэрээр, "Гол асуудал нь бид Орос эх орноо алдаж болзошгүй нөхцөл байдалд хүрээд байна. Цэргийн дэглэм тогтоох хэрэгтэй байна. Жирийн ардуудын хүүхдүүд авсанд орж, элитүүдийн хүүхдүүд наранд биеэ шарсан хэвээр байвал эхлээд цэргүүд босно, дараа нь тэдгээр цэргүүдийн ойр дотныхон босно. Энэ дайнд амиа алдсан цэргүүдийн хамаатан саднууд гээд хэдэн 10 мянган хүн байна. Удахгүй энэ тоо хэдэн зуун мянгад хүрнэ." хэмээн онцолжээ. Евгений Пригожин ЗХУ задарсны дараа ОХУ-ын Украинд чиглэсэн бодлогыг шүүмжлэхийн зэрэгцээ Кремль Украинд явуулж буй дайнаа "цэргийн тусгай ажиллагаа" гэж нэрлэсэн нь тодорхой бус, үл зохицох, эргэлзээ төрүүлсэн нэршил гэжээ. Түүний хэлж байгаагаар Оросын зэвсэгт хүчний удирдлагууд Украинд явуулж буй дайны туршид хэд хэдэн удаа бүтэлгүйтсэн аж.

Е. Пригожины хэлснээр ЗХУ-ын удирдагч Йосиф Сталин ийм зүйл болохыг хэзээ ч зөвшөөрөхгүй байсан ба ОХУ-ын хилийн Белгород муж халдлагад өртсөн нь Оросын зэвсэгт хүчний удирдлагуудын алдаа бөгөөд цаашид ч украинчууд ОХУ-ын нутаг дэвсгэр лүү довтлохыг зорих аж.

ОХУ энэ дайнд ялахын тулд илүү олон цэрэг дайчилж, дайны санхүүжилтээ нэмэгдүүлэх ёстой аж. Вагнер групп ОХУ Украин руу довтолсноос хойш 50 мянга орчим хоригдлыг эгнээндээ элсүүлсний 20 орчим хувь нь, хөлсний цэргүүдийнх нь 10 мянга нь ор сураггүй болжээ.

Бахмутад Украины 50 000-70 000 цэрэг шархдаж, 50 000 нь амиа алдсан гэжээ. Е. Пригожины хэлснээр ОХУ-ын Батлан хамгаалахын сайд Сергей Шойгугийн оронд цэргийн командлагч Михаил Мизинцевийг томилох, ОХУ-ын Зэвсэгт хүчний Ерөнхий штабын дарга Валерий Герасимовыг Сергей Суровикиноор солих ёстой аж.

Эх сурвалж: BBC

Содномцэрэнгийн Энхзаяа

ikhmongol.mn